1Ti 5 | BJR | STEP | Óo Timooti anée Yísuna ufa írimariasa faqa máridana sía faiqí firaasá ufa árua. Faiqí firaasá aní ákausara foora márifana reendeénamandee ufa qímannimia. Kumaaráauqa faqa aneenná ákaqaafasaara foorá kai ufa qímannimia ánaasee firaasá faqa aneenná ánausara foora ámiqimasee kai ufa qímannimia. Mánaaqa ánaaseeuqa faqa aneenná asooqmáakara foora andeeqáseenana kai misá faqa ufa qía.

1 Timothy 5

Pauroofa Timootina aakápeenoo faiqí ánaasee firaasá adeedaana anaaseeuqa faqa andeeqánnisaannee qu úfafa.

1 Óo Timooti anée Yísuna ufa írimariasa faqa máridana sía faiqí firaasá ufa árua. Faiqí firaasá aní ákausara foora márifana reendeénamandee ufa qímannimia. Kumaaráauqa faqa aneenná ákaqaafasaara foorá kai ufa qímannimia ánaasee firaasá faqa aneenná ánausara foora ámiqimasee kai ufa qímannimia. Mánaaqa ánaaseeuqa faqa aneenná asooqmáakara foora andeeqáseenana kai misá faqa ufa qía.

3 Adeedaana ánaaseeuqa misásaa rakísi maríasa sía márifana anée Yísuna ufara suqímariasa qímanniminaqa miqíra adeedaanauqasaa andeeqára rakisira rakísinnimaqaaqa. 4 Adeedaana ánaaseeuqa márifanoo nári nínaiqimara faqa faiqi námufaqa márifana anée qímanniminaqa misá quandáfi nári nínausa nitaatóosamara ámiqimmandee rakísinnimaqaaqa. Anée miqídana maaná faqa qímannimia, misá Ánutuna ufamau fídaqa indaarúqaa ainaina mifá máriannoo. Misásaa dadaaqamánnisaidaqa nári nínaukoo kadáapi ákiaqara nímimaríafanoo. Ánutufa faqa mi-oosannára áqaara ráidanoo. 5 Adeedaana ánaasee moó fannoo máridanoo minásaa rakísirafa moó fannoo sía márifa mifá káaqa adeedaana uqanná máridanoo. Miqíra adeedaana narí írirafa Ánutunasaa mundírafa máridanoo eendáki fáasaana Ánutunara dúfi dúfi qídanoo máridanoo minára kai dadaaqíannee qídanoo innaaru qídanoo. 6 Adeedaana ánaaseeuqa óosana moo áaqaidaqa máridaqa náriqa nídimari ainainnará kai qiqánuasauqa máridaqa misá dóo kúqiqa máridaqa miqíqa nídaqa. 7 Anée mi-adeedaana anaaseesára qímanniminaqa andeeqásee máriaqa múnuqi míniqi qiqáni foora.

8 Mi-ufána aiqámausa qímannimia. Maa-ufána faqa qímannimia. Moó fannoo Yísuna ufa írimarifa narí áiku ásauku faqa narí afaaqasáa áiku ásauku faqa nárana faqa qámunnaina faqa sía rakísinoo sía dadaaqínannai narí miqínnanannai Yísufa saqárikirana narí ateekéenoo aamína fasiqa mandóosana fínnaaqaramásee máreenoo miqídanoo.

9 Óo Timooti aní Yísuna ufara suqímariasasaa rakísirausa máriasa máridana adeedaana ánaasee asooqáuqa misá náriara náaduma ánaaseesaa rakísiranaikiqa máriaqa. Sía káqiqee adeedaanauqa mi-saikánaki mara quqáa, qaara moo fásiqa níku nísauku taikásee aukuana (60) maraqaasá adeedaanaikída asooqáqee maríasa kai mi-saikánaki quqásaina mária. Moodáa fasiqasaa amundóo adeedaanafá kai minakí máriani. 10 Mi-anaaseefá óoqai áfaari marufa márinnana mifá kai minakí máriani narí faiqi námu ámiqimasee fírimaru ánaaseefa márufa mifá kai máriani, ánaamuru dapi ánaamuru ámiqimmandee rakísimarufa faqa Ánutuna ufa maqúsa maqusa nída qímannimimárusa faqa nárana máaqa nímimarufa óosana óosana mandáinainaki áqufimarusa dadaaqímarufa, óosana óosana ámiqira ainaina eedóo qímasaida áuqee marúfa miqí máru anaasee asooqausá kai rakísirausaikiaqa.

(Mi-asooqa adeedaanáusa saiká Timootina áukuana maaqímminoo márinau. Misá fúka anaasee nári nifaaqmaaká faiqi námu rakísiaqeera qímannimidaqa naakápee máriqau. Áaqamaki káqirúnna fusá andeéqeeqeenoo Ánutuna aanái ubeekée máriqau. Mandáinainaki áqufusa andeeqásee Ánutuna ufa naakápee máriqau.)

11 Óo Timooti sía kumaaráa adeedaana anaasee maramáree ánaasee rakísiránaikia. Kumaaráa ánaasee kaifáa faiqíara ríqa ásauku mundírana saiká nímina minnísee foora. 12 Misá ásauku mundírana saikáki márianauree qíma afeekaikámasoona ateekéefoora. 13 Kumaaráa adeedaana ánaasee moómoo suanisaa máaqakiaqa fífau nímariafanoo aináinira áukuana áinnaaqaree márisa máriafanoo. Misá miqíqa nídaqa mandá úriqarara írirana marasée únnufa múnuqi míniqi qiqá nídaqa sía qíaqaa ufa qiqá nídaqa. 14 Óo Timooti qinée Pauroosa kumaaráa adeedaana ánaaseera maaqí qídaqa, misá andeeqásee máriaqeera. Misá kaifáa moo fásiqa marasée faiqi minásaa maqasée náriqa faiqisáa rakísida andeeqásee máriaqa. Misá miqí marifanoo maasá namuqáa Yísuna ufara níkooqee márisa maasáki randásee sía mandóosana paqúrimasee mandúfa uqéeraaqa. 15 Akaqá adeedaana ánaaseeuqa Ánutuna ufakíqari rakéemaki Sadannana áfaqee dóo fía.

16 Yísuna ufara suqímariasa misá rakísirausa akaqá adeedaana ánaasee náunannáasa síaisasaa rakísifaranoo, akaqá adeedaana ánaaseera náunannáasa faqaasasaa sía rakísiraree qídaqa. Mi-adeedaanáusa nári náunannáasamara nífiqa quqásee rakísifaranoo. Miqífanoo Yísuna ufa suqímariasasaa rakísimaria rakísirausa sía mi-umaarána máraaqeera.

Dóo adeedaana anaasee ufa taikásee kaifáa Yísuna ufara suqímariasara qianáura. Ánutuna tamummáqara fasiqa óoqai márusa ákaraki aináini maríasara qídanoo purimakáu kíkiqusidanoo maaqí qídanoo.

Ínnee ínneeqa purimakáu mara máree ráisa adi fooqáana narí áikunnai rafárimarinaqa sía náani fee qímasee óori ánaamususaifanoo káqi núannoo, ínnee sía miqíaqa akaqána náidanoo afaaqa asasímarinanoo rafáriani fee qímariqau.
Mi-tamummaqara fasiqáusa ákara minára kafáa maaqí qídanoo.

Aináini marí fasiqafa narí aináinímarina ákiaqara feefaurú máraannoo fee qídanoo.
Timooti Yísuna ufara suqímaría maqanaki kéeqee maríasa miqí kai iaqéera qídaqa.

Yísuna ufara suqímariasasaa rakísirausa ámiqimasee Ánutuna saiká uqéeree maríasa Ánutuna ufa kadáapi rúmasee ásaana rúmasee fuki faakí ímariasa Yísuna ufara suqímariasa sía amana kái feefaurú nímia fíqaramásee aabaara faqa nímia.

19 Faiqí moó fannoo Yísuna ufara suqímariasasaa rakísiranara aniréenoo mi-rakisiránara áaqaidanoommifoo qínaqa sía mi-moodaa fasiqána ufa íriaqa, naríaraa qídaqinoo. Faiqí qaraqánda fee qaaramoó fee anirée minára qífaqa miná irisée andeeqáaqa. 20 Yísuna ufara suqímaria máqanaki kéeqee marífa mandá oosana márainaqa aiqámausa nífusaa minára qáoo qídaqa ufa qiaqa. Miqímasaifaqa aiqámausa rufíasee sía miqífaranoo.

21 Óo Timooti qinée Pauroosa Ánutuna faqa ásauku mundírana faqa náaquqara qangiroouqa faqa misáuqa nífusaa qinée dóori kándamaseeqa ufa aní qímamíanaura. Qinée maqee maa-papiqánakinaa ufa qíma̱munnana ámiqimmandee mi-maú kai fídana Yísuna ufara suqímariasasaa rákirausa náriqa saiká amanakái feefaurú nimisée andeeqásee nári áaqarana aiqámausa nífusaa koorooía. Sía moonára qíqoondifée qímasee miná áaqarana kukéeqaisaa, sía moonára áamoondi fee qímasee mináindi akooroo mái̱sa. Aiqáma misóo máasoo moodáanaki kámmasee rakísinnimaqaa.

22 Anée sía dauní faiqí moó maréeqee Yísuna ufara suqímariasasaa rakísira saikaki quqásee sindímeera foora quqamáqáa. Anée sía moosá mandáinainaki áqufua, aninná márirafa aninna afaaqa ánukarafa kai máriani.

23 Timooti anée áranandaki maqee maqee aurímariananoo qinée minára irisée aní qímamidaqa, anée nammári uqanná kai maqee maqee néemariananoo anée sía miná kai náa, maasá maqee maqee néemarunnana úainna nammarina reendeénimarina miná káqikaaqoo námasainanoo aurírafa taikáani.

24 Faiqí akaqáusa misá mandáinaina fannoo aiqámausa nífusaa akooqóo máridanoo. Miqíra mandóosana fannoo nári nífusaa akooqóo misá rarisámeeqeenoo mandáinainaki quqáidanoo. Faiqí akaqáusa mandóosana sía dauní qáfeefara kásooqaqee akooqóo kambíqainaqa qáfeefaranoo. 25 Miqí kai ínoo ámiqira óosana fannoo aiqámausa faiqí nífusaa akooqóo máridanoo. Kukéeqara ámiqira óosana faqa sía kísaaqasaa kukéeqanoo máriannoo kásooqaqee mifá faqa akooqóo máriannoo.